Өрөспүүбүлүкэҕэ быйыл от былаана 457,5 тыһыынча туоннаҕа тэҥнэһэр, ол эрэн кураан күннэр тураннар от үүнүүтэ мөлтөөн 364,5 тыһыынча туонна от бэлэмнэнэрэ былааннанар. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
Иһитиннэриини Ил Дархан Айсен Николаевы кытта мунньахха Александр Атласов тириэртэ.
Тиийбэт 93 тыһыынча туонна оту Саха сиригэр чугас сытар атын регионнартан уонна оройуоннартан ылыахтара, ону тэҥэ мобильнай биригээдэлэр көмөлөрүнэн оттуурга СӨ тыа хаһаайыстыбатын министиэристибэтэ 51 мөлүйүөн солкуобайы көрүөҕэ.
От ыйын 29 күнүгэр Ил Дархан, кураан туран оттооһуҥҥа ыарахаттары үөскэппит сорох оройуоннарыгар ыксаллаах быһыы-майгы эрэһиимин олохтуур туһунан дьаһалга илии баттаабыта. Сорох улуустарга балаһыанньа ойуур баһаардарыттан уустугурда.
«Балаһыанньа ыарахан. Бүгүн ханнык улууска хас туонна от тиийбэтин, хантан ыларбытын, тиэйии кээмэйин туһунан боппуруостары ырытыахтаахпыт», — диэтэ Айсен Николаев.
Өрөспүүбүлүкэҕэ сүөһү аһылыгын бэлэмнээһин суһал штаба тэриллэн, номнуо бу кыһалҕалары быһаарар боппуруостарга үлэ бара турарын бэлиэтээтэ.
Мунньахха Мэҥэ Хаҥалас, Таатта, Уус Алдан, Нам, Чурпапчы, Амма, Өймөкөөн, Томпо, Хаҥалас уонна Уус Маайа баһылыктара кытыннылар.
Айсен Николаев, кураанынан үп тыыралларыгар премьер-миниистир Михаил Мишустиҥҥа туһаайан, СӨ тыатын хаһаайыстыбатын миниистиригэр Александр Атласовка улуустар докумуоннарын хомуйан Россия тыатын хаһаайыстыбатын министиэристибэтигэр ыытарыгар соруйда.
Маны таһынан, мобильнай биригээдэлэргэ субсидия көрүү боппуруостарын көрдүлэр, оттуур сирдэри 60 килэмиэтиртэн 40 килэмиэтиргэ диэри чугаһатар туһунан быһаарыы ыллылар. Бу оттооһуҥҥа элбэх киһи кыттыһарыгар олук буолуоҕа.
Ону тэҥэ, Саха сирин баһылыга улуустар оту тиэйиилэрин ороскуотун толуйарга уонна мобильнай биригээдэлэргэ уматыгы, арыыны мэктиэ суругунан биэриини хааччыйарга соруйда.
