2021 сыл тохсунньу 1 күнүттэн үлэлээбэт биэнсийэлээхтэр биэнсийэлэрин страховой чааһа 6,3 %-н индексацияланыаҕа. Бу туһунан «Российская газета» иһитиннэрэр.
Тустаах иһитиннэриини Россия вице-премьерэ Татьяна Голикова Госсэбиэт уонна стратегическай сайдыыга уонна национальнай бырайыактарга сэбиэт холбоһуктаах мунньахтарыгар эттэ.
«Үлэлээбэт биэнсийэлээхтэр биэнсийэлэрин страховой чааһа 2021 сыл тохсунньу 1 күнүттэн 6,3 %-н индексацияланыаҕа, ол эбэтэр инфляцияттан үрдүк», — диэн эттэ, ону тэҥэ кэлэр сылларга биэнсийэни индексациялааһын эмиэ инфляцияны куоһарыа диэн бэлиэтээтэ.
Инники Федерация Сэбиэтин кэмитиэтин бэрэссэдээтэлин социальнай бэлиитикэҕэ солбуйааччыта Елена Бибикова 2021 сыл олунньу 1 күнүттэн инбэлииттэргэ уонна бойобуой дьайыылар бэтэрээннэригэр көрүллэр ыйдааҕы төлөбүр быйылгы сыллааҕы инфляция таһымынан, ол эбэтэр 3,8 %-н үрдүүрүн туһунан иһитиннэрбитэ.
Ону таһынан, 2021 сыл муус ыйын 1 күнүттэн социальнай биэнсийэ үрдүүрэ уонна бастакы, иккис оҕо төрөөһүнүгэр көрүллэр ийэ хапытаала индексацияланара күүтүллэр.
