«Университет 2035» хампаанньа 8-11-с кылаас үөрэнээччилэригэр икки сыллаах IТ-куурустары тэрийэргэ субсидия ылыаҕа. Бу туһунан ТАСС иһитиннэрэр.
Россия бырабыыталыстыбатын тустаах уурааҕын бырайыага Россия цифровой сайдыыга, сибээскэ уонна маассабай коммуникацияларга министиэристибэтигэр таҕыста.
«Субсидия «Цифровая экономика Российской Федерации» национальнай бырагыраама чэрчитинэн «Развитие кадрового потенциала IТ-отрасли» саҥа федеральнай бырайыак тэрээһиннэрин олоххо киллэрэргэ көрүллүөҕэ. Үбүлээһин 8-11-с кылаас оҕолорун аныгы бырагыраамалааһыҥҥа үөрэтии ороскуотун сабыаҕа», — диэн министиэристибэҕэ иһитиннэрдилэр.
2022 сылга регион бары үөрэнээччилэрэ кууруска суруттарыахтарын сөп буолуоҕа, ол инниттэн киирии тургутугу толорорго сайаапканы биэрэр наада. Үөрэтии икки сыл устата ыытыллыаҕа, бүтэрдэхтэринэ кыттааччылар электроннай туоһу суругу ылыахтара.
«Бырайыак көмөтүнэн оҕолор программист идэтин кытта билсиэхтэрэ, бырагырааманы оҥоруу базовай уонна үрдүк сатабылыгар үөрэниэхтэрэ. 2024 сылга диэри 240 тыһыынчаттан аҕыйаҕа суох оҕо бырагырааманы баһылыаҕа», — диэн министиэристибэҕэ эбэн эттилэр.
2021 сыл алтынньытыгар «Университет 2035» уонна Россия цифровой сайдыыга, сибээскэ уонна маассабай коммуникацияларга министиэристибэтэ Саха сиригэр, Татарстаҥҥа, Белгородскай, Новгородскай, Пензенскэй уобаластарга оскуола оҕолорун бырагыраамалааһыҥҥа үөрэтиигэ пилотнай бырайыагы саҕалаабыта. Манна 14-тэн үөһэ саастаах икки тыһыынчаттан аҕыйаҕа суох оҕо үөрэниэҕэ.
