2021 сылга «Уһук Илиҥҥи ипотека» чэпчэтиилээх кирэдьиит бырагырааматын быраастарга уонна учууталларга тарҕатар былааннаахтар.
Бу туһунан Россия бэрэсидьиэнэ Уһук илиҥҥэ боломуочуйалаах бэрэстэбиитэлэ Юрий Трутнев алтыс Илиҥҥи экономическай форум түмүгүнэн пресс-конференция хаамыытыгар иһитиннэрдэ.
«Быйыл итини ситиһэр туһугар биһиги кыһаллабыт, бырагыраама номнуо үлэлээн саҕалаата. Ханнык эмэ атын категорияларга кэҥэтэр эбэтэр саастарынан хааччахтааһыны уһулар эмиэ уустуктардаах буолуо дии саныыбын», — диэтэ кини.
2019 сыл ахсынньытыттан 2%-наах «Уһук Илиҥҥи ипотека» бырагыраама үлэтин саҕалаабыта. Ипотека 35 саастарыгар диэри ыччакка эдэр ыалларга уонна соҕотох төрөппүт сааһа 35-гэр диэри, оҕотун сааһа 18-гар диэри буоллаҕына эмиэ туһаныахтарын сөп. Бу бырагырааманан билигин 24 тыһыынчаттан тахса эдэр ыал чэпчэтиилээх ипотеканы ылбыт.
