2022 сыл бүтүөр диэри Булуҥҥа, Алдаҥҥа уонна Аммаҕа «Цифровая экономика» национальнай бырайыак иитинэн эбии үс IT-киин арыллыа. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
«IT-салааҕа дьарыктаах дьон ахсаанын элбэтэр сыаллаахпыт. Билиҥҥи туругунан, кинилэр ахсааннара түөрт тыһыынчаҕа чугаһаата, бу 2018 сыллааҕы көрдөрүүттэн түөрт төгүл элбэх — оччолорго бу салааҕа Саха сирин 1,2 тыһыынча киһитэ баара бэлиэтэнэр», — диэн эрдэ Ил Дархан Айсен Николаев бэлиэтээбитэ.
2018 сылтан 15 маннык киини 14 улууска арыйдылар. IT-киин үлэһиттэрэ сүбэлээн-амалаан биэрэллэрин таһынан, аныгы цифровой компетенцияларга үөрэтэллэр.
