2022 сылга Абый улууһуттан 55 киһи социальнай хантыраак баттаспыт уонна бэйэ дьыаланы арынан саҕалыырыгар хапытаал ылбыт.
«Социальнай хантыраактары сүрүннээн үлэтэ суохтары кытта баттаһабыт. Ол эрээри, тиийинэн олоруу алын кээмэйиттэн кыра дохуоттаах үлэлээх дьон эмиэ социальнай хантыраакка холонуохтарын сөп. Онно олохтоох социальнай көмүскэл салалтатыгар тиийиэххэ наада. Улууска хамыыһыйалар тэриллэллэр, кинилэр докумуону көрөн, үп тыыраллар. Ол кэннэ икки сыл кэриҥэ биһиги социальнай хантыраагы туттуу үлэтин, дохуот төһө улааппытын бэрэбиэркэлиибит», — диэн СӨ үлэҕэ уонна дьарыктаах буолууга миниистирэ Елена Волкова эттэ.
Кини этэринэн, тустаах сыалларга былырыын алта мөлүйүөнтэн тахса солкуобай көрүллүбүт. Ол курдук, тоҕус ый устата социальнай көмүскэл уоргана профессиональнай сайдыыга уонна дьону өйүүргэ 300-тэн тахса тыһыынча солкуобай ыытар.
Өрөспүүбүлүкэ үрдүнэн тустаах технология баар буолуоҕуттан, 2010 сылтан саҕалаан 25 тыһыынча социальнай хантыраак баттаммыт, уопсай суумманан икки миллиардтан тасха солкуобай көрүллүбүт. Инники былааҥҥа – хантыраак ылбыт дьон дьыалатын түргэнник сайыннарарыгар, атын судаарыстыбаннай бырагырааммалары кытта аккумуляция олохтооһун буолар.
