2022 сыл сайын Россия бастыҥ лааҕырдарыгар өрөспүүбүлүкэ Арктика улуустарыттан 300-чэ курдук үөрэнээччи судаарыстыбаннай өйөбүл көмөтүнэн босхо сынньаныахтара. Бу туһунан СӨ Үөрэҕин уонна наукатын министиэристибэтин пресс-сулууспата иһитиннэрэр.
Премьер-миниистир Михаил Мишустин ахсынньытааҕы уурааҕын чэрчитинэн судаарыстыба оҕолор сынньаналларыгар бара-кэлэ бырайыастарын төлүөҕэ. Дойду бу сыалга регионнарга сыл аайы 500 мөлүйүөн солкуобай көрүллүөҕэ, быйыл Саха сирэ 30 мөлүйүөнү ылла.
«Ону таһынан, 500-чэ оҕо судаарыстыба бүддьүөтүн суотугар босхо путевканан өрөспүүбүлүкэ таһыгар лааҕырга сынньана барыан сөп», — диэн иһитиннэриигэ этиллэр.
Субсидиялар оройуоннарынан түҥэтиллибитэ бэлиэтэнэр. РФ Арктическай зонатын састаабыгар Саха сирин 13 оройуона киирэр: Абый, Аллайыаха, Анаабыр, Булуҥ, Үөһээ Халыма, Үөһээ Дьааҥы, Эдьигээн, Муома, Аллараа Халыма, Өлөөн, Орто Халыма, Усуйаана уонна Эбэн Бытантай.
