2022 сылга «Олорор дьиэ уонна куорат эйгэтэ» национальнай бырайыак чэрчитинэн Горнай улууһун Бэрдьигэстээх сэлиэнньэтигэр 176 ыалга сэттэ элбэх кыбартыыралаах дьиэни тутуохтара.
Саҥа кыбаартал «2019-2025 сс хаарбах туруктаах дьиэлэртэн дьону көһөрүү» бырагырааманан тутуллар.
Саха сирин Ил Дархана Айсен Николаев сэлиэнньэлэри, куораттары уонна территорияны кэлимник сайыннарыы квартальнай тутуутун наадатын эрдэ бэлиэтээбитэ. Бэрдьигэстээххэ кыбаартал территорията биэс тыһыынчаттан тахса квадратнай миэтэрэҕэ тэҥнэһэр. «Адгезия» бэдэрээтчит сэттэ мэндиэмэннээх 26 кыбартыыралаах дьиэни тутууну ыытар.
СӨ тутуутун министиэристибэтин иһитиннэриитинэн, бүгүҥҥү күҥҥэ сэттэ дьиэ көндөйө барыта тутулунна, инженернэй ситимнэри киллэрдилэр. Ону таһынан баһаарынай резервуардары уонна носуос станциятын дьиэлэрин тутууга монолитнай үлэлэр түмүктэннилэр.
Эбийиэктэри тутуу бэлэмэ 30% тэҥнэһэр.
«Сотору кэминэн тутааччылар кырыыһа, дьиэ үрдүнээҕи өттүн үлэтин түмүктүөхтэрэ. Ол кэнниттэн технологическай тохтобул буолуоҕа. Саас үлэлэр салҕаныахтара уонна 2022 сыл бүтүүтэ эбийиэк үлэҕэ киириэҕэ», — диэн иһитиннэриигэ этиллэр.
Быйыл Горнай улууһугар биэс тыһыынчаттан тахса квадратнай миэтэрэ иэннээх икки элбэх кыбартыыралаах олорор дьиэ тутулунна, онно 425 киһи көспүтэ. 2025 сылга диэри оройуоҥҥа 14 385,77 квадратнай миэтэрэ иэннээх хаарбах дьиэлэртэн дьону көһөрүөхтэрэ. Билигин онно 1225 киһи олорор. Ити сыалга 2025 сылга диэри федеральнай онна өрөспүүбүлүкэтээҕи бүддьүөттэн 1,650 млрд солк. көрүлүннэ.
Региоҥҥа квартальнай тутууга бөдөҥ инвестиционнай бырайыактар олоххо киллэриллэллэр: Дьокуускайга «Звезднай» микрооройуон, Нерюнгригэ «Р» кыбаартал. Бүгүҥҥү күҥҥэ «Звезднайга» дьону хаарбах дьиэттэн көһөрүү бырагырааматынан сэттэ дьиэҕэ 358 кыбартыыраны атыыласпыттар. Ону таһынан, Нерюнгригэ «Р» кыбаарталга кыбартыыралары атыылаһыахтара.
