Быйыл өрөспүүбүлүкэ түөрт оройуонугар «Тыа сирин кэлимник сайыннарыы» судаарыстыбаннай бырагыраама чэрчитинэн үбүлээһин кээмэйэ 5,5 мөлүйүөн солкуобай буолар. Бу туһунан СӨ тутуу министиэристибэтин пресс-сулууспата иһитиннэрэр.
Өрөспүүбүлүкэҕэ тутуу миниистирин солбуйааччы Евгений Афанасьев этэринэн, бырайыактары сүүмэрдээһиҥҥэ сүрүн ирдэбил олохтоох дьон интэриэһэ уонна кыттыыта буолар. Хамыыһыйа уопсайа 17 оройуонтан киирбит 52 сайаапканы көрдө. Ыйыллыбыт болдьох кэнниттэн киирбит 17 сайаапка көрүллүбэтэ.
«Хамыыһыйа чилиэннэрэ киирбит докумуоннары үөрэттэ уонна түөрт бырайыагы талла. Ол курдук, быйыл Хаҥалас улууһун Көрдөм сэлиэнньэтигэр Ленин уулуссатыгар сквер, Үөһээ Бүлүү улууһун Харыйалааҕар Ыһыахха аналлаах дьону-сэргэни көрсөр ураһа уонна күнү көрсөр зона, Томпо улууһун Кэскилигэр сүүрэр дорожка тутуллуохтара, оттон Кэбээйи Арыылааҕар уулуссаны сырдатыы ыытыллыаҕа», — диэн Евгений Афанасьев эттэ.
Судаарыстыбаннай бырайыагы өйүүргэ судаарыстыбаннай көмө үбүлээһинэ икки мөлүйүөнтэн үрдээбэт, бырыайыагы хааччыйыы 70%-тан үрдүө суохтаах. Итиэннэ, 30%-ҥа диэри үбүлээһин олохтоох бэйэни салайыныы өттүттэн көрүллүөн сөп. Ону тэҥэ гражданнар эбэтэр юридическай сирэйдэр, уопсастыбаннай эбэтэр волонтерскай тэриллиилэр кылааттарын суотугар 30% үбүлээһин хааччыллыан сөп
