Олунньу 11 күнүгэр 2023 сылга Өймөкөөн улууһугар «Полюс Холода-Оймякон» — төрдүс кыһыҥҥы экстремальнай сүүрүү марафона ыытыллыаҕа. Тэрээһини СӨ спортка уонна физическэй култуураҕа министиэристибэтэ, «Өймөкөөн» муниципальнай оройуона тэрийэллэр. Кыттыгас тэрийээччилэр: СӨ «Историческай өйдөбүл» федеральнай партийнай бырайыак, норуот икки ардыларынааҕы «Хотугу форум» тэриллии, СӨ тас сибээскэ уонна норуот дьыалатыгар министиэристибэтэ.
Тэрээһиҥҥэ идэтийбит спорстменнар уонна 18-тан үөһээ саастаах сөбүлээн дьарыктанар дьон кыттыахтарын сөп.
Марафонецтар Өймөкөөнтөн Бороҕон II Томторугар диэри сүүрүөхтэрэ. Ол күн быһа холоон -41 кыраадыс буолара билгэлэнэр. Бүгүҥҥү туругунан күрэххэ Саха сириттэн 106 киһи, ону тэҥэ Башкортостантан, Пермтэн уонна Волгоградтан суруттарбыттар.
2022 сылга марафоҥҥа эр дьонтон — Василий Лукин (Чурапчы улууһа) уонна дьахталлартан — Марина Седалищева (Орто Халыма) кыайбыттар.
