СӨ Үп миниистирин эбээһинэһин толорооччу Иван Алексеев алтынньы 15 күнүгэр Саха Өрөспүүбүлүкэтин 2026 сылга уонна былааннаах 2027-2028 сылларга судаарыстыбаннай бүддьүөтүн туһунан сокуон бырайыагын уопсастыбаннай истии кэмигэр 2026 сылга уонна былааннаах 2027-2028 сылларга судаарыстыбаннай бүддьүөт былаанын сүрүн кэрчиктэрин иһитиннэрдэ.
СӨ судаарыстыбаннай бүддьүөтүгэр бары социальнай өҥөлөрү толоруу. 2026 сылга социальнай-култуурунай хайысха ороскуота доруобуйа харыстабылыттан, үөрэҕирииттэн, социальнай бэлиитикэттэн, физкультураттан уонна спортан турар — 130 млрд 263,5 мөл солк.
«СӨ 2026 сыллааҕы судаарыстыбаннай бүддьүөтүн социальнай хайысхата оннунан хаалар. Ол иһин төһө даҕаны уларыйыылар киирбиттэрин үрдүнэн, СӨ бырабыыталыстыбата дьиэ кэргэттэри, оҕолору, аҕам саастаахтары өйүүр дьаһаллары үбүлээтэ. Бу саха дьонун-сэргэтин олоҕун хаачыстыбатын үрдэтэргэ туһуламмытын бигэргэтэр», — диэн иһитиннэриигэ этиллэр.
Ол курдук, «Дьиэ кэргэн өйөбүлэ» регионнааҕы бырайыак үбүлээһинэ 117,5 мөл солк улаатар. Өрөспүүбүлүкэтээҕи Ийэ хапытаалыгар, эдэр ыаллар холбоһоллоругар, бастакы оҕо төрүүрүгэр көрүллэр төлөбүрдэргэ, оҕо ыйдааҕы босуобуйатыгар үбү-харчыны ыытыахтар.
Кыаммат ыалларга социальнай хантыраак, элбэх оҕолоох ыалларга оскуоланы бүтэрэр оҕоҕо төлөбүрдээх орто үөрэххэ туттарсарыгар төлөбүр сорҕотун толуйуу ороскуота күүтүллэр.
