Гражданскай уопсастыбаны сайыннарыыга Ил Дархан граннарын куонкуруһугар сайаапкалары ылыы түмүктэннэ. 23 хайысхаҕа 364 сайаапка киирдэ. Бу туһунан Саха сиринээҕи биир кэлим ресурснай киин пресс-сулууспата иһитиннэрэр.
«Саха сирин коммерческайа суох тэрилтэлэрэ көхтөөхтөрүн көрдөрдүлэр. Өрөспүүбүлүкэҕэ территорияны сайыннарарга, олох-дьаһах хаачыстыбатын тупсарарга уонна олохтоохторго саҥа өҥөлөрү киллэрэргэ бэлэмнэр», — диэн иһитиннэриигэ этиллэр.
Саха сиринээҕи биир кэлим ресурснай киин бу куонкуруһу тэрийиигэ улахан үлэни ыытта.
«Биһиги түөрт үөрэтэр вебинары ыыттыбыт. Онно НКО-ттан 240 бэрэстэбиитэл кытынна. Биир кэлим ресурснай киин координатордара 231 экспертизаны уонна 310 консультацияны ыыттылар», — диэн кииҥҥэ кэпсииллэр.
Куонкурус түмүгүнэн, социальнай хайысхалаах коммерческайа суох бырайыактарга бэрэсэдьиэн пуондата өйүүрүнэн сибээстээн, 97,5 мөл. солк. тыырыллыаҕа.
