2020-2024 сылларга хаачыстыбалаах дьиэнэн хааччыйыы уонна олох-дьаһах коммунальнай өҥөлөрүн хаачыстыбатын үрдэтии судаарыстыбаннай бырагырааматынан 2022 сылга өрөспүүбүлүкэ 400-тэн тахса эдэр ыала олорор усулуобуйаларын тупсарыахтарын сөп. Бу туһунан СӨ тутуу министиэристибэтин пресс-сулууспата иһитиннэрэр.
«Быйыл өрөспүүбүлүкэ 35 оройуонун 411 эдэр ыала уопсайа 491,9 мөлүйүөн солкуобай суумалаах социальнай төлөбүрү ылыаҕа. Төлөбүр кээмэйэ дьиэ кэргэн чилиэнин ахсааныттан тутулуктаах, ортотунан 700 тыһыынчаттан 2,5 мөлүйүөн солкуобайга диэри буолуон сөп. Төлөбүрү олорор дьиэни атыылаһыыга ипотека бастакы усунуоһун быһыытынан, эбэтэр чааһынай дьиэни атыылаһыыга, итиэннэ тутууга кирэдьиит бырыһыанын, сүрүн иэһин төлөбүрүгэр туһаныахха сөп», — диэтэ тутуу миниистирин бастакы солбуйааччы Галина Новикова.
Өрөспүүбүлүкэҕэ сыллата эдэр ыаллар субсидиянан туһаныыларын ахсаана элбээн иһэрин бэлиэтээтэ.
2021 сылга бу бырагыраама иитинэн 373 эдэр ыал сертификат ылбыт. Бу сыалга уопсайа 354,77 мөлүйүөн солкуобай тыырыллыбыт. Социальнай төлөбүр федеральнай, өрөспүүбүлүкэтээҕи уонна муниципальнай бүддьүөттэн көрүллэр.
Бырагыраамаҕа кыттар туһугар эдэр ыал дьиэ-уот усулуобуйатын тупсарыыга наадыйарынан билиниллиэхтээх, кирэдьиит ыларга, эбэтэр дьиэ орто сыанатын төлүүргэ социальнай төлөбүр кээмэйин куоһарар дохуоттаах буолуохтаах.
Бырагыраамаҕа кыттааччылар саастара 35-тэн ордуо суохтаах. Социальнай төлөбүр кээмэйэ биир уонна элбэх оҕолоох ыалларга олорор дьиэ сыанатын 35%-на уонна бырагыраамаҕа оҕолоро суох кыттааччыларга 30%-на тиксэр. Састаабыттан тутулуга суох эдэр ыал, ол иһигэр аҥардас төрөппүттээх эдэр дьиэ кэргэн социальнай төлөбүрү ылыан сөп.
