Саха сирин кадастровай балаатататын архыыба 41 тыһыынчаттан тахса сир учаастагын докумуонун электроннай халыыпка киллэрдэ. Бу туһунан биэдэмистибэ пресс-сулууспа иһитиннэрэр.
«Докумуоннары сыыппараҕа көһөрүү хамсаабат баай-дуол эбийиэктэрэ турар сирдэриттэн тутулуга суох өҥөнү оҥоруу тэтимин үрдэтэргэ көмөлөһөр. Кадастровай учуот туһунан сайабылыанньа, межевой уонна техническай былааннар, ону тэҥэ үлэҕэ киллэрии көҥүлүн куоппуйата сканнаналлара ирдэнэр. Киллэриллибит файллар бары исписэлиис бэйэтин электроннай илии баттааһынынан бигэргэнэллэр», – диэн кадастровай балаата архыыбын салайааччытын солбуйааччыта Елена Удовенко бэлиэтээтэ.
Сэтинньи 1 күнүн туругунан балаата архыыбыгар 60 тыһыынчаттан тахса хамсаабат баай-дуол биир кэлим судаарыстыбаннай реестиригэр эбийиэк туһунан сибидиэнньэлэр олоҕуран киилэриллэр докумуоннара харайыллар. Кинилэр эбийиэк баарын уонна киллэриллибит уларытыылары бигэргэтэллэр.
Гражданнар сөбүлэһии түһэрсиитигэр эбэтэр сир мөккүөрүн бэрээдэктээһиҥҥэ докумуоннары архыыптан ирдиэхтэрин сөп. Ыйытыгы МФЦ офистарын нөҥүө, кадастровай балаата аадырыһыгар суруйан эбэтэр Росреестр электроннай сервистэрин нөҥүө ыытыахха сөп. Биир запроска биир докумуон бэриллэрэ этиллэр. Сибидиэнньэлэри биэрии болдьоҕо үс үлэ күнүгэр тэҥнэһэр.
