Өрөспүүбүлүкэ 700-тэн тахса олохтооҕо «Кыайыы волонтердара» бүтүн россиятааҕы хамсааһын кыттыылаахтарынан буоллулар. Бу туһунан СӨ баһылыгын уонна бырабыыталыстыбатын пресс-сулууспата иһитиннэрэр.
Тэрилтэ сүрүн үлэтэ алта федеральнай бырайыагы хабар. Ол курдук, «Улуу Кыйаыы», «Көлүөнэлэр сибээстэрэ», «Мин Кыайыым», «Биһиги Кыайыыбыт», «Медиа Кыайыы», «Мин историям».
Хамсааһын региональнай салаата 2019 сыллаахха кулун тутар ыйга тэриллибитэ. Биир сыл иһигэр Саха сирин куораттарыгар уонна улуустарыгар хамсааһын салаатын арыйыытыгар, дойдуга бэриниилээх буолууга аналлаах тэрээһиннэри ыытыыга, сэрии уонна тыыл бэтэрээннэригэр харчынан көмө оҥоһулларыгар улахан үлэ ыытыллыбыта бэлиэтэнэр.
«Биһиги Өйдөбүнньүк уонна Албан аат сылын чэрчитинэн ыытыллар тэрээһиннэр сүрүн кыттааччылара уонна тэрийээччилэрэ буолабыт. 2020 сылга маҥнайгы тэрээһининэн «Блокада килиэбэ» аахсыйа ыытыллыбыта. Ол кэннэ, олунньу 27 күнүгэр өрөспүүбүлүкэ бары улуустарыттан биэс тыһыынча кэриҥэ киһи Аҕа дойду сэриитин историятын туһунан билиилэрин бэрэбиэркэлиир тэрээһиҥҥэ кыттыбыта», — диэн хамсааһын Саха сиринээҕи салаатын салайааччыта Алгыс Петров эттэ.
Кулун тутар 27 күнүгэр генеалогическай дааннайдары, Аҕа дойду сэриитин кыттыылаахтарын туһунан сибидиэнньэ хомуйуу аахсыйата ыытыллара былааннанар. Маны сэргэ инники «Георгиевскай лиэнтэ» уонна «Өйдөбүнньүк чүмэчи» аахсыйалар ыытыллыахтаахтара бэлиэтэнэр.
Алгыс Петров этэринэн, Хамсааһын Саха сиринээҕи салаатыгар орто уонна үрдүкү үөрэх кыһаларын устудьуоннара, уопсай үөрэхтээһин оскуолатын үөрэнээччилэрэ уонна аҕа саастаах көлүөнэ дьоно киирсэллэр.
Дойду үрдүнэн Өйдөбүнньүк уонна Албан аат сылынан 50 тыһыынчаттан тахса киһи волонтер быһыытынан регистрацияны ааспыта бэлиэтэнэр.
Кыайыы волонтера буолуон баҕалаахтар волонтерыпобеды.рф. сайтыгар киирэн сайаапкаҕытын биэриҥ.
