Былырыын «Саханефтегазсбыт» хампаанньа ыраах сытар оройуоннары 2 438 тонна оттугунан хааччыйбыт. Бу туһунан хампаанньа генеральнай дириэктэрэ Виктор Лебедев иһитиннэрэр.
«Тэҥнээн көрдөххө, 2020 сыллаахха 2 318 тонна тиийбитэ. Ону кытта ньиэп бородууктатын оҥорон таһаарыы 560 тыһ. тонна, былаан — 515 тыһ. тонна этэ. Бу хайысхаҕа былаан 109% туолла. Ааспыт сылга үлэ түмүгэ үчүгэй, ньиэп бородууктатын атыылаһыыга былаан 120% туолла — 174 тыһ. тонна. Сүрүн поставщиктар — „Газпромнефть-Региональные продажи“, „Роснефть“. Ону кытта Санкт-Петербургтааҕы биржаттан ыллыбыт», — диэбит кини.
Хампаанньа Дьокуускайга компримированнай гааһынан сапараапканы саҕалаата, быйыл өссө Ленскэйгэ уонна Покровскайга баар буолуоҕа.
«Саханефтегазсбыт» хампаанньа урукку дириэктэрэ Игорь Никитин коррупцияҕа буруйданан, алта сылга көҥүлэ быһыллыбытын туһунан Виктор Лебедев санаатын эттэ. Суут уурааҕынан Никитин хампаанньаҕа оҥорбут хоромньутун толуйуохтаах — 45 мөл. солк.
«Хампаанньаҕа билигин профилактическай бэрэбиэркэ ыытабыт, инвентаризация, хонтуруоллуур-кээмэйдиир оборудование туруорабыт. Саҥа дуоһунаһы арыйдыбыт — генеральнай дириэктэри куттала суох буолууга солбуйааччы. Бу дуоһунаска Дьокуускай полициятын управлениетын салайааччынан үлэлээбит Николай Кульбертинов ананна. Мин салгыы даҕаны профилактическай бэрэбиэркэни ыытыам. Ньиэп базаларын эмиэ бэрэбиэркэлиэхпит. Филиаллартан биирдэстэригэр оттугу улахан кээмэйдээх уоруу тахсыбыт диэн уорбалыыбыт», — диэбит Виктор Лебедев.
