Бэрдьигэстээххэ «Чыпчаал» стадиоҥҥа оҕунан ытыыга оҕолорго өрөспүүбүлүкэҕэ бастыыр иһин күрэхтэһии түмүктэннэ. Быйыл Горнай улууһугар үһүс улахан чемпионат ыытылынна.
Түөрт күннээх сүүмэрдиир күрэх түмүгүнэн кыайыылаахтар Россия чемпионатыгар уонна буолаары турар «Азия оҕолоро» VIII-с норуоттар икки ардыларынааҕы оонньууларга кытталлар. Турнирга 13 улуустан 150 оҕо кытынна.
Күрэхтэһии олимпийскай дистанцияларга 70 уонна 50 миэтэрэҕэ ыытылынна. Охчуттар классическай уонна блочнай охторунан ыттылар. Оҕолору сэргэ 21 диэри саастаах ыччаттар эмиэ күрэхтэстилэр.
Халлаан төһө да тыалырдар үчүгэй дьарыктаах охчуттар оноҕосторун сыалларын ортотугар түһэртээн, инники күөҥҥэ тахсан үчүгэй бэлэмнээхтэрин көрдөрдүлэр.
«Азия оҕолоро» ооньууларга сүүмэрдиир түһүмэҕи ааһан Горнай улууһуттан түөрт оҕо хамаандаҕа киирдэ. Онтон биирдэстэрэ чаҕылхай ситиһиилэрдээх Василий Филиппов аатынан улуустааҕы гимназия 9 кылааһын үөрэнээччитэ кэскиллээх спортсмена Светлана Колодезникова буолар
Өрөспүүбүлүкэ сүүмэрдэммит хамаандата бу ый бүтүүтэ Агинскай куоракка Россия чемпионатыгар кытта барыаҕа.
