Кэлиҥҥи сылларга тыйаатыр эйгэтэ биллэ сайынна, көрөөччүтэ да элбээтэ диэтэхпитинэ сыыспаппыт. Ол курдук, Сунтаардааҕы норуот тыйаатыра эдэр дьону бу эйгэҕэ сыһыаран олус таһаарыылаахтык үлэлиир.
Бу күннэргэ Наталья Михалева — Сайа хоһооннорунан саҥа испэктээги сүрэхтиэхтэрэ.
Норуот суруйааччыта Наталья Михалева — Сайа олус элбэх хоһоонноро ырыа буолан көппүттэрэ. Оттон испэктээк аан бастакытын турар. Артыыстар музыка, пластика, сыана уотун көмөтүнэн хоһоон ис тутулун көрөөччүгэ тириэрдэн биэриэхтэрэ.
Динислам Тууйас Сунтаарга үһүс испэктээгэ буолар. Аныгы, ураты көрүүлээх режиссер мэлдьи аҕыйах киһини хамсатар уонна дьону соһутар албастары сатабыллаахтык туһанар.
Бу иннинэ Алампа «Таптал» уонна «Олох дьэбэрэтэ» драмалары туруорбута.
