Бүгүн, сэтинньи 13 күнүгэр, Дьокуускай куоракка ыытыллар III «Цифровой Алмаз» федеральнай форум иккис күнэ. Форум чэрчитинэн куорат киин пааркатыгар бүгүн сарсыарда Экстремальнай сүүрүү буолла. Манна 42 киһи кытынна. Кинилэр 5 килэмиэтир уһуннаах кэрчиккэ сүүрдүлэр. Бу спортивнай түгэн «АрктикТелеком» сибээс операторын өйөбүлүнэн ыытылынна.
«Биһиги форум кыттыылаахтарын өссө күүскэ түмэр сыалбытыттан бу кыһыҥҥы экстремальнай сүүрүүнү ыыттыбыт. Манна дьон-сэргэ дуоһуйа-астына билистэ, кэпсэттэ. Маннык түгэн кинилэри дьиҥ-чахчы биир сомоҕолоох хамаанда гынан түмэр диэн эрэллээхпин», – диэн «Цифровой алмаз» форум спортивнай тэрээһиннэрин тэрийэр кэмитиэтин эппиэттээҕэ Иван Степанов эттэ.
Спортивнай уонна култуурунай тэрээһиннэр улахан форумнарга үгэс быһыытынан ыытыллаллар. Бу нэһилиэнньэ спортка уонна чөл олоххо тардыһарын бэлиэтэ буолар.
Форумҥа Россия атын регионнарыттан кэлбит ыалдьыттарга сүүрүү умнуллубат түгэн буолла. Кинилэр Саха сирин кыһынын тыынын эттэринэн-хааннарынан биллилэр.
Ону тэҥэ кыттыылаахтар ортолоругар РФ цифровой сибээһин уонна маассабай коммуникация сайдыытын миниистирин солбуйааччы Андрей Заренин киирдэ. Кини бэлиэтииринэн, маннык тэрээһиннэргэ туохтан да толлубат эрэ спортсменнар кытталлар уонна хас биирдиилэригэр кыайыылаах буолар, бастыҥнар ортолоругар сылдьар баҕаны сүтэрбэттэригэр баҕарда.
Хаартыска: «Цифровой Алмаз» федеральнай форум телеграм-ханаала
