«Биһиги күүспүт — түмсүүгэ» улуустааҕы эдэр ыччат патриотическай форума ыытылынна.
Форумҥа 6 нэһилиэктэн эдэр ыччат ГТО спартакиадаҕа, ырыа-үҥкүү бэстибээлигэр уонна квест-марафоҥҥа күрэхтэстилэр.
Форум улууспут эдэр ыччатын түмэр, дьоҕурдаах ыччаты өйүүр сыаллаах-соруктаах тэрилиннэ. Күрэх бирииһин пуондатыгар улуус бүддьүөтүттэн 150.000 солкуобайы көрбүттэр. Ол эбэтэр, бастаабыт хамаанда 70 тыһ. солкуобайы, 2-с миэстэҕэ тахсыбыт хамаанда 50 тыһ. солкуобайы, 3-с миэстэни ылбыт хамаанда 30 тыһ. солкуобайы ылаллар.
Ахсынньы 9 күнүгэр А.И.Донской аатынан манежка «Готов к труду и обороне» ыччат спартакиадатыгар ыччаттар 5 көрүҥҥэ күрэхтэстилэр. Спартакиада кэннэ О.Д. Федорова аатынан киин библиотекаҕа «Герои нашего времени» квест-марафон ыытылынна. Форум патриоттуу ырыаҕа уонна үҥкүүгэ бэстибээл-күрэҕинэн түмүктэннэ. Манна 6 хамаанда — Хоро, Үөһээ Бүлүү, Нам, Өргүөт, Дүллүкү, Кэнтик нэһилиэктэриттэн дьоҕурдаах ыччат патриотическай ырыалары уонна үҥкүүнү толордо.
«Биһиги күүспүт — түмсүүгэ» улуустааҕы эдэр ыччат форумун түмүгэ ахсынньы 16 күнүгэр улуустааҕы Патриотическай форумҥа биллиэҕэ.
