Ааспыт сууккаҕа өрөспүүбүлүкэҕэ эбии 81 киһи коронавирустаабыта бигэргэннэ. Бу туһунан бүгүн, ыам ыйын 25 күнүгэр Ил Дархан Айсен Николаев эпидемиологическэй балаһыанньа боппуруостарынан брифинг кэмигэр иһитиннэрдэ.
Дьокуускайга коронавируһунан ыалдьыы 56 саҥа түбэлтэтэ бэлиэтэннэ, Алдаҥҥа — 12, Миирнэйгэ — түөрт, Намҥа уонна Мэҥэ Хаҥаласка үстүү, Ленскэйгэ — икки уонна Тааттаҕа — биир.
Ыалдьыбыт дьон бары балыыһаҕа киллэрилиннилэр, алтыспыт дьоннорун быһаарыы уонна изоляцияҕа олордуу үлэлэрэ ыытыллаллар.
12 киһи коронавирустан толору эмтэнэн балыыһаттан таҕыста, 10 — ыарахан туруктаах. 313 киһи амбулаторнай эмтэниини ааһар, бары ыарыыны сибикитэ суох аһардаллар.
