Өрөспүүбүлүкэ 30 тыһыынча кэриҥэ дьиэ кэргэнэ үһүгэр диэри саастаах оҕолорго көрүллэр 5000 солкуобай кээмэйдээх, муус устар уонна ыам ыйдааҕы эбии төлөбүрү тутта.
Санатар буоллахха, ыам ыйын 11 күнүгэр Россия бэрэсидьиэнэ Владимир Путин үһүгэр диэри саастаах оҕолордоох дьиэ кэргэттэргэ, ийэ хапытаалын ылар бырааптарыттан тутулуга суох эбии көмө көрөр туһунан ыйааҕы баттаабыта.
«Бу уустук кэмҥэ дойду бырабыыталыстыбата оҕолоох дьиэ кэргэттэри өйөөһүҥҥэ ураты болҕомто уурар. 2020 сыл ыам ыйын 27 күнүн туругунан федеральнай хааһынаттан көрүллүбүт уопсайа 307,8 мөлүйүөн солкуобай кээмэйдээх тустаах төлөбүрү өрөспүүбүлүкэ 28759 дьиэ кэргэнэ тутта. Муус устар уонна ыам ыйга көрүллэр эбии төлөбүр толору төлөннө. Үһүс төлөбүр бэс ыйыгар оҥоһуллуоҕа», — диэн өрөспүүбүлүкэтээҕи биэнсийэ пуондата тириэрдэр.
Эбии төлөбүр муус устар ыйтан бэс ыйыгар диэри үс ый устата, хас биирдии үһүгэр диэри саастаах оҕоҕо көрүллэр. Сайабылыанньаны судаарыстыбаннай өҥө порталын уонна Россиятааҕы биэнсийэ пуондатын сайтын «Ийэ (дьиэ кэргэн) хапытаала» балаһа нөҥүө биэриэххэ сөп.
