Жатайдааҕы судоверфь оройуонугар тимир конструкциялары оҥорор кластер аһары былаанныыллар. Манна урутаан сайдыы территория тэриллиэ.
Тустаах сайаапканы Уһук Илиҥҥи уокурук сайдыытын министиэристибэтигэр ыыппыттарын туһунан бырабыыталыстыба бэрэссэдээтэлэ Владимир Солодов иһитиннэрдэ.
Бу ТОР-га Жатайдааҕы судоверфь былаһааккалара уонна «Восход» механическай собуот саҥа сыахтара резидент быһыытынан киирэллэрэ былааннанар.
Бүгүн бу собуот үлэтин бырабыыталыстыба бэрэссэдээтэлэ билистэ.
Күн бүгүн тэрилтэ араас тимир конструкциялары оҥорор, хайа байытар тэриллэри өрөмүөннүүр. Собуокка сылга 1 200 туонна тимири туһаҕа таһаараллар. Инникитин оҥорон таһаарыыны элбэтэр уонна муоста конструкцияларын оҥорор соруктаахтар.
«Билигин собуоппутугар саҥа бырагырааманан үлэлиир станоктары атыылаһаары сылдьабыт. Ол станоктар оператора суох бэйэлэрэ үлэлиэхтэрин сөп. Чочуйар, үүттүүр уонна плазменнай станоктарбытын саҥатытар былаанаахпыт», — диэн «Восход» механическай собуот хомуйар сыаҕын салайааччыта Петр Семенов кэпсээтэ.
