Саха сирин олохтооҕо Анатолий Добрянцев РФ норуоттарын сомоҕолоһууларын бөҕөргөтүү уонна норуот култууратын сайыннарыыга кылаатын иһин, Бүтүн россиятааҕы «Гордость нации» иккис истиэпэннээх лауреатынан буолла. Бу туһунан өрөспүүбүлүкэтээҕи тас дойдулары кытта сибээс министиэристибэтэ иһитиннэрэр.
«Потомки государевых ямщиков» өрөспүүбүлүкэтээҕи уопсастыбаннай тэрилтэ регионнааҕы бэрэссэдээтэлэ «Национальнай-култуурунай холбоһуктар бастыҥ салайааччылара» куонкурус анал аатынан наҕараадаланна.
«Гордость нации» бириэмийэ 2020 сылга норуоттар култууралара сайдарыгар уонна олоҕурарыгар гражданнар кыттыыларын көҕүлүүр, норуоттар икки ардыларыгар или-эйэни олохтуур уонна Россияҕа олорор араас омуктары сомоҕолуур сыаллаах олохтонно.
Саха сириттэн куонкуруска 50-тан тахса киһи кытынна, дойдуттан уопсайа 700-тэн тахса сайаапка киирдэ.
