Саха, эбээн, эбэҥки, чукотскай, долган уонна дьүкээгир тылларын үөрэтэр үөрэх порталын сүрэхтэниитэ СӨ үөрэҕин үлэһиттэрин тохсунньу ыйынааҕы мунньахтарын чэрчитинэн ааста. Бу туһунан СӨ үөрэх уонна наука министиэристибэтин пресс-сулууспата иһитиннэрэр.
Бырайыагы С.Н. Донской II аатынан Үөрэҕи сайыннарар уонна идэни үрдэтэр институт дириэктэрэ Ньургун Павлов билиһиннэрдэ. Тэрээһиҥҥэ учууталлар, төрөөбүт тыл уонна литература учууталлара, сонуну киэҥник тарҕатар сириэстибэлэртэн бэрэстэбиитэллэр кытыннылар.
Ньургун Павлов бэлиэтээбитинэн, портал «2020-2024 сылларга Саха сиригэр судаарыстыбаннай уонна официальнай тыллары харыстааһын уонна сайыннарыы» судаарыстыбаннай бырагыраама чэрчитинэн олоххо киирдэ.
Бу портал төрөөбүт тыл уонна литература учууталларыгар улахан көмөлөөх буолуон сөп диэн бэлиэтииллэр. Манна видеоуруоктар, үөрэтэр пособиялар, учууталлар методическай пособиелара, кэпсээннэр, мультиктар бааллар.
«Биһиэхэ өрөспүүбүлүкэҕэ саха тылын үөрэтии уруок быһыытынан үөрэтиллэр, ону тэҥэ өрөспүүбүлүкэ официальнай тыллара үөрэтиллэллэр: эбээн, эбэҥки, дьүкээгир, чукотка уонна долган тыллара. Хас биирдии тыл уратылаах, уһулуччулаах. Билигин глобализация уонна информатизация кэмигэр тылы үөрэтии букатын саҥа көрүҥү эрэйэр. Ол курдук, үөрэх портала бу аныгы кэм ирдэбилигэр эппиэттиир көрүҥүнэн оҥоһулунна», — диэтэ миниистир Ирина Любимова.
