Ыам ыйын 18 күнүгэр III норуоттар икки ардыларынааҕы «Хомусист-виртуоз мира» куонкурус түөскэ кэтиллэр үрүҥ көмүс бэлиэтин билиһиннэриэхтэрэ. Бу норуоттар доҕордоһууларын, Саха сирин кэрэ айылҕатын, ураты майгылаах дьонун бэлиэтиир 27 цирконий тааһынан симэммит үрүҥ көмүс бэлиэлэри тоҕус витруоз-хомусчут кэтиэҕэ. Куонкурус бэс ыйын 16-17 күннэригэр Дьокуускайга ыытыллар. Уопсайа Россия регионнарыттан, тас дойдуттан 40-тан тахса киһи кыттара былааннанар.
Кыайыылаахтар үрүҥ көмүс бэлиэнэн уонна 50 тыһ. солк. наҕараадаланыахтара, ону таһынан виртуоз-хомусчут үрдүк аатын ылыахтара. Бэстибээл кэмигэр Орджоникидзе болуоссатыгар хомус тардыытыгар флешмоб тэриллиэҕэ, манна өрөспүүбүлүкэ араас муннугуттан 100-тэн тахса киһи биир матыыбы хомуска дьүрүһүтүөҕэ. Гала-кэнсиэр бэс ыйын 17 күнүгэр Саха тыйаатырыгар буолуоҕа. «Хомусист-виртуоз мира» бастакытын 1991 сыллаахха тэриллибит. Онно Петр Оготоев, Спиридон Шишигин уонна Федора Гоголева виртуоз-хомусчут аатын ылбыттара. Иккис куонкурус 2011 сыллаахха тэриллибит. Манна Альбина Дегтярева, Юлияна Кривошапкина-Дьүрүйээнэ уонна Ким Борисов виртуоз буолбуттара.
