Алтынньы 19 күнүгэр Арктикатааҕы судаарыстыбаннай агротехнологическай университет (АГАТУ) инженернэй факультетын устудьуоннара байыаннай дьайыылар бэтэрээнэ, СВО бэтэрээнэ Николай Пестряковы кытары көрүстүлэр.
АГАТУ инженернэй факультетын декадатын чэрчитинэн көрсүһүү ыытылынна.
Николай устудьуоннарга тыа хаһаайыстыбатын академиятыгар Мех-98 бөлөххө үөрэммит, устудьуоннаабыт, РФ Сэбилэниилээх күүстэригэр сулууспалаабыт кэмнэрин кэпсээбит. «Водоканал» тэрилтэҕэ ыскылаат хаһаайыстыбатыгар үлэлии сылдьан быстах хомуурунан СВО-ҕа барбыт.
Хас биирдии гражданин Аҕа дойдуга бэриниилээх, бары ыарахаттары туоруурга түмсүүлээх, эппиэтинэстээх буолуу, бэйэ-бэйэҕэ көмөлөһүү ханнык баҕарар тургутууну туоруурга, кэм ирдэбилигэр эппиэттииргэ, өрөспүүбүлүкэни уонна Россияны сайыннарар соруктары ситиһиилээхтик быһаарар буолуохтааҕын Николай бэлиэтээтэ.
«Миэхэ тиэхиньическэй үөрэҕим күннээҕи олохпор олус көмөлөһөр. Идэбинэн улахан тэрилтэҕэ үлэлиирим таһынан байыаннай дьайыыга олус туһалаата. Үөрэхпэр ылбыт билиим, үөрүйэҕим бэйэбэр эрэ буолбакка, бойобуой уолаттарбар эмиэ көмө буолла», — диэн Николай Пестряков кэпсээтэ.
Николай устудьуоннарга билиилэрин хаҥатарга уонна төрөөбүт дойдуларын сайдарын туһугар үлэлииргэ сүбэлээтэ.
«Үчүгэйдик үөрэниҥ! Бастыҥ техническэй исписэлиис, инженер сүрэҕэлдьээһини кытары дьүөрэлэспэттэрин өйдөөҥ», — диэтэ Пестряков.
Устудьуоннар көрсүһүүнү олус сэргээбиттэр, элбэх ыйытыыны биэрбиттэр. Устудьуоннар ааттарыттан ЭТ-23 бөлөхтөн Иван Винокуров байыаска махтал тылы эппит.
