Бүгүн, ахсынньы 3 күнүгэр, дойду үрдүнэн Юрист күнэ бэлиэтэнэр. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
Саха сирин юристарын Ил Дархан Айсен Николаев эҕэрдэлээтэ.
«Уопсастыба сыһыаннаһыыларын хамсааһына юрист идэлээхтэртэн, суһал быһаарыыны, бигэ өйдөөх-санаалаах буолууну уонна муҥутуур куһаҕан содуллары туоратарга дьулуһууну ирдиир. Хас биирдиигит күннээҕи, тыҥааһыннаах үлэтинэн Россия судаарыстыбаннаһын бөҕөргөтүүгэ тус кылаатын киллэрэр», — диэтэ кини.
Баһылык бэлиэтээбитинэн, өрөспүүбүлүкэҕэ коррупцияны утары охсуһуу уонна босхо юридическай көмө, оҕо быраабын көмүскүүргэ уонна нэһилиэнньэни кытта кэпсэтии Бүтүн Россиятааҕы күннэрэ үгэскэ кубулуйдулар.
«Саха сиригэр киэҥ хабааннаах Юристар мунньахтара, түмсүүлэрэ ыытыллар. Сыллата юриспруденция эйгэтигэр идэтигэр бастыҥ үлэһиккэ Федоров аатынан өрөспүүбүлүкэтээҕи Судаарыстыбаннай бириэмийэ ананар», — диэн Айсен Николаев эбэн эттэ.
Маны таһынан, цифровизация үлэ бары эйгэтигэр киирэн эрэрин, бу өттүнэн сайдыы уонна саҥа технологиялары туһаныы — кэлэр кэм юриһын ситиһиитэ буоларын туһунан санаатын эттэ.
