Тохсунньу 3 күнүнээҕи туругунан, киин куоракка 171 бэйдиэ ыты туттулар, ол иһигэр Автодорожнай уокурукка — 45. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
Дмитрий Садовников салайааччылаах биэдэмистибэлэр мунньахтарыгар биэс күннээх үлэ түмүгүн көрдүлэр. Бастакы вице-премьер бэлиэтээбитинэн, бэйдиэ ыттары тутуу куорат үрдүнэн тохтоло суох ыытыллыахтаах.
Маны таһынан, кыыллары быстах кэмҥэ иитэр пууннар үлэлэрэ көрүллэрэ, эбии дьиэ-уот тыырыллара наадатын Садовников чопчулаата.
Билиҥҥи туругунан, ыттары тутар 10 бөлөх уонна таһар икки бөлөх тэриллибит, 32 киһи, 11 тиэхиньикэ кыттар. Иккилии бөлөҕү Автодорожнай уонна Промышленнай уокурукка ыыппыттар, атын уокуруктарга — биирдии.
Ахсынньы 30 күнүттэн куорат Биир кэлим диспетчерскэй сулууспатын иһинэн суһал иһитиннэриини тиэрдэр киини тэрийдилэр.
Бу кэм устата гражданнартан чат-ботунан 1209 иһитиннэрии киирдэ, ЕДДС нөҥүө — 1006. Итиэннэ, куорат уокуругар кыыллары быстах кэмҥэ иитэр пууну бэлэмнииллэр.
