Ил Дархан Айсен Николаев улуус уонна куорат уокуругун баһылыктарыгар балыыһаларга уонна аптекаларга эмп баар буолуутун хонтуруоллуулларыгар соруйда. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
«Балыыһаларга уонна аптекаларга эмп баар буолуутун уонна эбии куойка тэрийии боппуруостарын баһылыктар хонтуруолга ылаллара туһааннаах», — диэн иһитиннэриигэ этиллэр.
Аптекаларга эмп суоҕун, ону тэҥэ сыанатын үрдэтэн атыылыылларын, ПЦР ньыматынан анаалыс болдьоҕо уһунун туһунан гражданнартан үҥсүү киирэрин Айсен Николаев бэлиэтээн эттэ. Дьокуускайга лабораторнай чинчийии хаамыытынан балаһыанньа тупсар буоллаҕына, улуустарга уонна сорох куорат балыыһаларыгар, ол иһигэр бастакы балыыһаҕа, болдьох уһуна бэлиэтэнэр.
Санатан эттэххэ, Росздравнадзор өрөспүүбүлүкэ аптекаларыгар бэрэбиэркэ ыыппыта.
