Бүгүн, ыам ыйын 6 күнүгэр, Саха сирин бортпроводниктарын сулууспата 80 сылын бэлиэтиир. Ил Дархан Айсен Николаев авиация үлэһиттэрин бырааһынньыгынан сөмөлүөккэ туран эҕэрдэлээтэ.
«Бүгүн Саха сирин бортпроводниктарын сулууспата 80 сылын туолла! Ис-сүрэхпиттэн эһигини үбүлүөйдээх бэлиэ күҥҥүтүнэн эҕэрдэлиибин! Талбыт идэҕитигэр, үлэҕитигэр бэриниилээххитин иһин махтанабын», — диэн кини телеграм ханаалыгар суруйда.
Дойду үрдүнэн гражданскай авиацияҕа бортпроводник дуоһунаһа 1939 сылга баар буолбута. Саха сиригэр буоллаҕына — 1944 сылга ыам ыйын 6 күнүгэр 31 №-дээх ВТКУ перегоночнай тыраассатын салайааччытын бирикээһинэн. Авиатырааныспар этирээтин бастакы стюардессата — Нина Миненко. 1947 сылга Москваҕа, Алма-Атыга, Ташкеҥҥа, Новосибирскайга, Красноярскайга, Иркутскайга диэри рейстэр арыллыбыттара, онон сиэттэрэн, стюардессалар ахсааннара эмиэ элбээбитэ.
1955 сылга хас биирдии авиаэкскадрилияларга иккилии стюардесса баар буолуохтаах этэ, ол эрээри бортпроводниктар сулууспалара өссө да суоҕа. Бастакы бортпроводниктар бөлөхтөрө 1957 сылтан баар буолбута. Бу саҕана Ил-14 элбэх миэстэлээх сөмөлүөтү үлэҕэ киллэрбиттэрэ.
