Алтынньы 22 күнүгэр Саха сирин Ил Дархана Айсен Николаев Донецкай Норуодунай Өрөспүүбүлүкэҕэ үлэ сырыытынан бойобуой чаастарга Саха сирин эр санаалаах, хорсун саллааттарын кытары көрүстэ.
Байыастары кытары көрсүһүү олус сэргэхтик, истиҥник ааста диэн Ил Дархан бэлиэтээтэ.
«Сорох уолаттары билэбин, элбэхтэ көрсүбүтүм уонна кинилэр кэпсээннэрин истэн турардаахпын. Билигин байыастарбыт дойду көмүскэлигэр Кыайыы туһугар киирсэллэр. Уолаттар биһигини көрсөннөр олус үөрдүлэр, күннээҕи олохторун туһунан кэпсээтилэр уонна Саха сиригэр эҕэрдэлэрин тиэртилэр. Кинилэртэн кэккэ боппуруостар, баҕа санаалар киирдилэр. Манна улахан болҕомто ууруллуоҕа», — диэтэ Айсен Николаев.
Айсен Николаев полигоннарга сырытта. Манна байыаннай сулууспалаахтар бойобуой бэлэмнэниини ааһаллар. Ону тэҥэ Ил Дархан пилота суох көтөр киин үлэтин кытта билистэ. Кииҥҥэ Саха сирин байыастара олус көхтөөхтүк үлэлииллэр.
«Хамандыырдары кытары кэпсэттим. Саха сирин байыастара хорсуннук, чиэстээхтик сулууспалыылларын иһиттэхпинэ олус үөрэбин. Саха сирэ бэйэтин буойуттарынан киэн туттар! Биһиги кинилэри Кыайыы көтөллөөх дьиэлэригэр төннөллөрүн күүтэбит!», — диэн Айсен Сергеевич кэпсээтэ.
