РФ Судаарыстыбаннай Сэбиэтин «Энергетика» хайысхалаах хамыыһыйатын бастакы мунньаҕар 2025 сыллаах үлэ түмүктэннэ уонна 2026 сыллааҕы былаан бигэргэннэ. Сүрүн тиэмэ — дойду энергетикатын эппиэгин үрдэтии буолла. Мунньах Москваҕа хамыыһыйа салайааччыта, Саха Өрөспүүбүлүкэтин Ил Дархана Айсен Николаев салалтатынан ааста.
2025 сылга хамыыһыйа 13 мунньаҕы ыытта. Онно уот ситимин саҥардыы, регионнары гаастааһын, убаҕас гаас уматыгын сайыннарыы уонна каадырдарынан хааччыйыы курдук боппуруостар көрүлүннүлэр. Хамыыһыйа сорох этиилэрэ сокуоннарга уонна дойду салалтатын сорудахтарыгар, ол иһигэр чох бырамыысыланнаһын өйөөһүн дьаһалларыгар, киирдилэр.
2026 сыл үлэтин былаана РФ Энергетикатын министиэристибэтин кытта сөбүлэһилиннэ.
Мунньахха дойду экэниэмикэтин энергетикатын көдьүүһүн үрдэтиигэ ураты болҕомто уурулунна. Россия билигин энергоемкоһы туһаныыны аччатыы тэтиминэн аан дойду орто көрдөрүүтүттэн хаалан иһэр.
Хамыыһыйа салайааччыта бэлиэтээбитинэн, судаарыстыбаннай бырагырааманан 2035 сылга диэри ис баалабай бородуукта (ВВП) энергетика сыаната 2019 сыллааҕы таһымтан 35% аччыахтаах. 2050 сылга диэри энергетика стратегиятынан уоту оҥорон таһаарыыга уматык ороскуотун аччатыы (248-тан 239 г/кВт*ч диэри) уонна ситимнэргэ сүтүгү кыччатыы (10,1%-тан 7,3%-ҥа диэри) соруктара тураллар.
Саха сирин холобуругар чопчу дьаһаллар ахтылыннылар:
• бүддьүөт тэрилтэлэригэр соруктаах көрдөрүүлэрү туруоруу;
• ресурсалары салайар информационнай тиһиктэри киллэрии;
• дизель уматыгын кэмчилиир күн панельдаах гибриднэй энергетика комплекстарын тутуу.
Айсен Николаев этэринэн, биир кэлим национальнай бэлиитикэ, салалта систиэмэтэ, хас биирдии регион кыаҕын сыаналааһын уонна бастыҥ уопуту тарҕатыы наада.
«Бу тиэмэ дойду таһымыгар экэниэмикэбит куоталаһар кыаҕар (конкурентоспособность) дьайар. Регионнарга бүддьүөт харчытын кэмчилиир эрэ буолбакка, дьон-сэргэ хомунаалынай өҥөлөргө ороскуотун аччатар уонна олох хаачыстыбатын тупсарар суолталаах», — диэн Айсен Николаев эттэ.
Кини 35% аччатыы соругун хас биирдии салаанан уонна регионнар уратыларын учуоттаан чопчулуур наадатын ыйда. Сир-дойду климатын, бырамыысыланнаһын хайысхатын учуоттааһын уонна федеральнай таһымтан өйөбүл ВВП энергетикатын сыанатын аччатыыны түргэтэтиэҕэ.
