Саха сирин Ил Дархана, РФ Судаарыстыбаннай сэбиэтин «Энергетика» хайысхатын хамыыһыйатын бэрэссэдээтэлэ Айсен Николаев Казань куоракка «Энергопром» электроэнергетическай форумҥа кыттыыны ылла.
Билигин бу форум дойдубутугар да, аан дойдутааҕы бииргэ үлэлээһиҥҥэ да суолталаах энергетикэ сайдыытын боппуруостарын дьүүллэһэр сүрүн былаһааккалартан биирдэстэрэ буолар. Тэрээһин үөрүүлээх аһыллыытыгар РФ энергетикэ миниистирэ Сергей Цивилев, Татарстан Раиһа Рустам Минниханов уонна тас дойдулартан ыалдьыттар кытыннылар. Киэҥ быыстапкаҕа электроэнергетика салаатыгар саҥа сүүрээннэри уонна быһаарыылары билиһиннэрдилэр. Манна бастыҥ хампаанньалар уонна тэрилтэлэр үлэлэрэ турдулар.
«ГОЭЛРО 2.0: возрождение легенды» диэн пленарнай мунньахха энергетическэй инфраструктураны саҥардыы, цифровой технологиялары олоххо киллэрии, технологическай тутулуга суох буолууну бөҕөргөтүү, генерацияны сайыннарыы туһунан кэпсэттилэр.
Ону тэҥэ Айсен Сергеевич Тутулуга суох судаарыстыбалар сойууһун (СНГ) электроэнергетика сэбиэтин мунньаҕар кытынна. Манна электроэнергетика салаатыгар бииргэ үлэлээһин сүрүн боппуруостарын, энергетическэй систиэмэлэр бигэ туруктаахтык үлэлииллэрин хааччыйыыны уонна судаарыстыбалар икки ардыларынааҕы бииргэ үлэлээһини кэҥэтиини ырыттылар.
