Бүгүн, алтынньы 17 күнүгэр, Ил Дархан Айсен Николаев Саха сиригэр Ийэ күнүнэн уонна быйыл аан бастаан бэлиэтэнэр Россияҕа Аҕа күнүнэн эҕэрдэлээтэ. Бу туһунан Саха сирин баһылыгын уонна бырабыыталыстыбатын пресс-сулууспата иһитиннэрэр.
Дьулурҕатык уларыйар аныгы кэмҥэ хас биирдии обургу саастаах уонна эдэр киһиэхэ сиэр-майгы, тутта-хапта сылдьыы өттүнэн чопчу өйдөбүллээҕэ кини тус көрүүлээх, бигэ санаалаах буоларыгар, бэйэтин гражданин быһыытынан билинэригэр дьоһун суолталаах буолуохтааҕын бэлиэтиир.
«Оҕону иитиигэ-такайыыга төрөппүттэр – ийэ уонна аҕа сүҥкэн сабыдыаллаахтар. Ийэ барахсан оҕотун өрүү көмүскүүр, сылаас сыһыанынан, кыһамньытынан, үтүө тылынан угуттуур, өйүүр. Ийэлэрбит муҥура суох тапталларынан биһиги улаатабыт, сайдабыт, олоххо бэйэбит суолбутун көрдөөн булабыт, тупсабыт уонна үрдүккэ дьулуһабыт.
Аҕа үүнэр көлүөнэҕэ Аҕа дойдуга тапталы, тулалыыр эйгэҕэ харыстабыллаах сыһыаны иҥэрэр, эр санаалаах буоларга, Ийэ дойдуну таптыырга, дьоһун киһи, дьиэ кэргэн бигэ тирэҕэ буоларга иитэр-такайар», — диэтэ Айсен Николаев.
Ил Дархан этэринэн, дьоллоох киһини иитэн таһаарыы, куттала суох уонна нус-хас эйгэлээх дьиэ кэргэни тэрийии уонна сайыннарыы – хас биирдии төрөппүт анала.
Саха Өрөспүүбүлүкэтигэр ийэ уонна аҕа аналын үрдэтиигэ, элбэх оҕолоох ыаллар ахсааннарын элбэтиигэ уонна кинилэри өйөөһүҥҥэ, үгэс курдук, сүҥкэн болҕомто ууруллар.
«Дойду үрдүнэн сүрүннээн дьиэ кэргэни уонна оҕо сааһы өйүүр судаарыстыба бэлиитикэтэ көдьүүстээхтик олоххо киирэр. Киһи туһугар, кини ситиһиилээх уонна дьоллоох олохтонорун туһугар Арассыыйа национальнай сыаллара ситиһиллэллэр, дойдубут олох бары эйгэлэригэр тэтимнээхтик сайдар.
Бары ийэлэргэ уонна аҕаларга чэгиэн доруобуйаны, чугас уонна аймах-билэ дьону кытта дьоллоох олоҕу, улахан ситиһиилэри баҕарабын! Эһиги төрүккүт-уускут үйэлэргэ утумнаах уонна бигэ буоллун!», — Айсен Сергеевич эттэ.
