Бүгүн, олунньу 28 күнүгэр, Саха сирин Ил Дархана Айсен Николаев бырабыыталыстыба салалтатын кытта сүбэ мунньахха арҕаа дойдулар киллэрбит санкцияларын кэмигэр региоҥҥа социальнай уонна экономика өттүнэн туруктаах буолар туһугар сөптөөх миэрэлэри ылынар наадалааҕын иһитиннэрдэ. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.
«Бүгүн биһиги бэлиитикэ өттүнэн олус ураты быһыыга-майгыга олоробут. Дойдубутун арҕаа уонна Европа дойдулара күүскэ ыгаллар, кытаанах хааччахтыыр миэрэлэр киллэрэллэр. Биһиги манныкка бэлэм буолуохтаахпыт. Саха сиригэр арҕааҥҥы хааччахтааһыннар усулуобуйаларыгар олох-дьаһах уонна экономика туруктаах буолуутун хааччыйар сорук турар. Билигин биһиги бэрэсидьиэммитин, Украинаҕа денацификацияны уонна демилитаризацияны ыытыыны тэрийэр аармыйабытын күүскэ өйүөхтээхпит. Бу боппуруос быһаарыллыа диэн эрэнэбин», — диэтэ Айсен Сергеевич.
Ил Дархан Россия бэрэсидьиэнэ бу кыһалҕаны быһаарыыга элбэҕи оҥорорун бэлиэтээтэ.
«Биһиги дойдубутугар Украинаттан биир эрэ ирдэбил баара – НАТО киирбэккэ, кимиэхэ да сыстыбат нейтральнай дойдунан буоларыгар. Ол эрээри, Украинаҕа фашистар аһаҕас идеологиялара баһылыыр идеологиянан буолар кэмигэр биһиги Кыайыы туһугар аан дойдуга элбэҕи сүтэрбит, XX үйэҕэ фашизмы суох оҥорорго уонунан мөлүйүөн киһи толук буолбут дойдута, ыаллыы сытар дойдубут фашист дойдута буоларын баҕарбаппыт», — диэн Айсен Николаев билиэтээтэ.
