Убаастабыллаах Сахабыт сирин муниципальнай тэриллиилэрин баһылыктара уонна депутаттара! Күндү муниципальнай сулууспа үлэһиттэрэ уонна бэтэрээннэрэ!
Саха Өрөспүүбүлүкэтин салалтатын аатыттан эһигини Россия үрдүнэн бэлиэтэнэр Олохтоох бэйэни салайыныы күнүнэн итиитик-истиҥник эҕэрдэлиибин!
Эһиги быһаарыныыларгытыттан уонна таһаарыылаах үлэҕититтэн сэлиэнньэлэрбит, бөһүөлэктэрбит, куораттарбыт, ону тэҥэ оҕолорбут, сиэттэрбит инникилэрэ түстэнэр. Нэһилиэнньэ кыһалҕаларын, уустуктардаах балаһыанньаларын, боппуруостарын быһаарарга кыһаллар эппиэтинэстээх муниципальнай былаастан өрөспүүбүлүкэбит инники сайдыыта тутулуктаах.
Ааспыт сылларга сүҥкэн улахан үлэни оҥордугут. Өрөспүүбүлүкэбит нэһилиэнньэлээх пууннарыгар национальнай бырайыактар, федеральнай уонна регионнааҕы бырагыраамалар чэрчитинэн сүүһүнэн саҥа элбэх кыбартыыралаах дьиэлэр уонна социальнай эбийиэктэр, ону тэҥэ оскуолалар, уһуйааннар, спортивнай комплекстар, култуура дьиэлэрэ тутулуннулар. Сэлиэнньэлэргэ, бөһүөлэктэргэ, куораттарга тыраанспар инфраструктурата сайдыытыгар, ититиини биэриигэ, уоту тардыыга элбэҕи оҥордугут. Олох хаачыстыбатын үрдэтэр үлэ салҕанар.
Анал байыаннай дьайыыга улахан көмөнү оҥороргутугар махтанабын. Оройуоттар тирэх пууннар нөҥүө байыастары өйүүллэр. Байыастар инники кирбиигэ кыайыыны ситиһэргэ дьулуһаллар. Оройуон делегациялара фроҥҥа эбии таҥас-сап, обмундирование, тиэхиньикэ, байыастар чугас дьонноруттан баһыылка тиэрдэллэр, уолаттарбыт санааларын өрө көтөҕөллөр.
Бүгүҥҥү күҥҥэ СВО балаһатыгар байыастарбытын кытта тэҥҥэ биэс улуус баһылыга өстөөҕү утары кыргыһар. Ону таһынан, нэһилиэк дьаһалталарын баһылыктара, солбуйааччылара. Кинилэр эр санаалаах салайааччылар холобурдара буолаллар.
Убаастабыллаах олохтоох бэйэни салайыныы дьаһалтатын үлэһиттэрэ!
Судаарыстыбаннай, муниципальнай былаас уорганнарын уонна олохтоох бэйэни салайыныы уорганнарын биир уопсай сүрүн сыалбыт-сорукпут — хас биирдии киһи олоҕун өрөспүүбүлүкэҕэ тупсарыы буолар. Биир күүспүтүнэн биһиги барытын быһаарыахпытын сөп. Бу манна биһиэхэ тирэх быһыытынан дойду бэрэсидьиэнэ Владимир Владимирович Путин илии баттаабыт «Об общих принципах организации местного самоуправления в единой системе публичной власти» федеральнай сокуон буолуоҕа. Бу сокуон бэс ыйын 19 күнүттэн үлэлиэҕэ. Сокуону ылыныыттан дойдуга олохтоох бэйэни салайыныы сайдыытын саҥа түһүмэҕэ саҕаланна. Онон бары бииргэ өрөспүүбүлүкэҕэ өссө эппиэктээх олохтоох бэйэни салайыныы систиэмэтин сайыннарыахпыт.
Бу бэлиэ күҥҥэ хас биирдиигитигэр күүстээх доруобуйаны, этэҥҥэ буолууну, дьолу уонна улуу дойдубут, төрөөбүт өрөспүүбүлүкэбит сайдалларын-үүнэллэрин туһугар үлэҕитигэр ситиһиилэри баҕарабын!
