Ил Дархан Айсен Николаев медиктэр идэлээх бырааһынньыктарын көрсө Саха сирин быраастарыгар судаарыстыбаннай наҕараадалары туттарда. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.
«Пандемия кэмигэр медиктэр доруобуйаларын көмүскээһин уонна куттал суох буолуутун хааччыйыы — биһиги уопсай сорукпут. Эмчиттэр үлэлиир усулуобуйаларын тэрийиигэ инники сылларга ордук болҕомто уурулуохтаах», — диэн Айсен Николаев бэйэтин эҕэрдэтигэр эттэ.
Ил Дархан Саха сирин бары медицинскэй үлэһиттэрин идэлээх бырааһынньыктарынан эҕэрдэлээн туран, кинилэр идэлэригэр бэриниилэрин уонна киллэрэр кылааттарын иһин махтанна.
Бочуоттаах ааттары, Ил Дархан грамоталарынан уонна туйгун бэлиэлэри өрөспүүбүлүкэ доруобуйа харыстабылын салаатын 21 үлэһитэ тутта.
