РФ Судаарыстыбаннай Сэбиэтин «Энергетика» хайысхатын хамыыһыйатын бэрэссэдээтэлэ Айсен Николаев РФ Госсэбиэтин «Энергетика» хайысхатын хамыыһыйатын быйылгы сылга түмүктүүр мунньаҕы ыытта.
2024 сыл түмүктэрин таһаардылар, 2025 сыл былааннарын дьүүллэстилэр, ону тэҥэ бырамыысыланнаска уматык энергетика эбийиэктэригэр куттал суох буолуутун боппуруостарын көрдүлэр.
Бүгүҥҥү күҥҥэ хамыыһыйаҕа 136 киһи киирэр, ол иһигэр 17 регион салайааччыта. Сыл иһигэр бары кыахпытынан-күүспүтүнэн улахан үлэни оҥордубут.
«Биһиги 11 мунньаҕы ыыппыппыт, манна чох бородууксуйатын таһыыттан саҕалаан 2050 сылга диэри энергетика сайдыытын стратегиятыгар диэри боппуруостары кэпсэппиппит. Хамыыһыйа чилиэттэрэ «Новые атомные и энергетические технологии» диэн национальнай бырайыак оҥоһуллуутугар уонна бигэргэтиитигэр кыттыыны ылбыттара. Кэлэр сылга биһигини өссө элбэх үлэ күүтэр. Бары соруктары толоруохпут диэн эрэллээхпин. Хамыыһыйа чилиэттэригэр түбүктээх, сыралаах үлэҕит иһин махтанабын!», — диэн Ил Дархан эттэ.
