Бүгүн, атырдьах ыйын 19 күнүгэр, Ил Дархан Айсен Николаев СӨ Бырабыыталыстыбатын чилиэттэрин уонна Ил Дархан дьаһалтатын салайааччыларын кытта мунньах ыытта.
Өрөспүүбүлүкэ баһылыга үлэтин сырыытынан анал байыаннай дьайыы балаһатыгар сылдьан кэлбитин уонна норуоттар икки ардыларынааҕы байыаннай-техническэй «Армия-2024» пуорумҥа кыттыбытын сүрүн түмүктэрин таһаарда.
«СВО-ҕа Саха сириттэн тиэхиньикэни, оборудованиены тиэрдэри түргэтэтэн биэриэххэ наада. Онон көмөнү ыытарга ылынар быһаарыныылар бириэмэтин аччатан биэриэххэ наада, оччоҕо үлэ түргэнник барыа», – диэн Айсен Николаев сыалы-соругу туруорда.
Мунньахха өрөспүүбүлүкэ социальнай-экономическай балаһыанньатын, федеральнай уонна регионнааҕы бырагыраамалар олоххо киирэр боппуруостарын дьүүллэстилэр. Ил Дархан миниистирдэр хосторун саҥа үөрэх дьылыгар, оттук сезонугар, хоту улуустарга таһаҕаһы тиэйиигэ бэлэм үлэтин күүһүрдэргэ сорудахтаата.
Айсен Николаев оттук сезонугар бэлэм Аллайыаха, Аллараа Халыма уонна Булун улуустарыгар номнуо саҕаламмытын бэлиэтээтэ.
Ону тэҥэ мунньахха уопсастыбаннай-политическэй тэрээһиннэри тэрийэр уонна Дьокуускай, Нерюнгри маастар-былааннарын олоххо киллэрэр боппуруостарын дьүүллэстилэр.
Хаартыска: Андрей Сорокин, ЯСИА
