Бүгүн Ил Дархан Айсен Николаев СӨ Бырабыыталыстыбатын уонна Дьаһалтатын салалтатын кытта мунньах ыытта.
РФ бэрэсидьиэнэ Владимир Путин көҕүлээбит национальнай бырайыактарын чэрчитинэн олоххо киирэр саҥа федерапьнай көҕүлээһиннэр туһунан дьүүллэстилэр. Ол иһигэр «Совершенствование экстренной медицинской помощи» бырайыак туһунан кэпсэттилэр. Бу бырайыак «Уһун уонна көхтөөх олох» национальнай бырайыак иитинэн киирэр. Ол курдук, Россия Бырабыыталыстыбата санавиация сайдыытыгар Саха сиригэр 122 мөлүйүөн солкуобайы көрбүт.
«Биһиги киэҥ сирдэрбитигэр бу тырааныспар эрэ буолбатах, кэмигэр киһи доруобуйатын, олоҕун быыһыыр кыах буолар», — диэн Айсен Николаев эттэ.
Ону тэҥэ «Международная кооперация и экспорт» саҥа национальнай тосхол иһигэр киирэ сылдьар «Системные меры развития международной кооперации и экспорта» федеральнай бырайыак экспордын регионнааҕы кииннэрин өйүүргэ РФ Бырабыыталыстыбата эбии үбү көрөргө быһаарыммыт. Онон 2025 сыл бүтүөр диэри 1,1 тыһ тахса экспортнай хантараагы баттаһан былааннанар. Саха сирэ бу сыалга-сорукка 11 мөл тахса солк ылыаҕа.
Айсен Николаев бэлиэтииринэн, Саха сиригэр маннык миэрэлэр дьоһуннаахтар, бу дьоҕус уонна орто биисинэскэ тас ырыынаакка тахсар кыаҕы биэрэр.
Ону таһынан планеркаҕа 100 тыһ диэри киһилээх кыра куораттарга үлэлиир тутааччыларга аналлаах кирэдьииттэри субсидиялыыр бырагыраама туһунан кэпсэттилэр. «Жильё и городская среда» национальнай бырайыагынан 2025 сылга бу сыалга-сорукка 500 мөл солк көрүллүөҕэ. Бырагыраама көмөтүнэн тутааччылар сылга 12% ставкалаах льготнай кирэдьиит ылар кыахтаныахтара. Бу 2026 сылга туттарыллан бүтүөхтээх 390 тыһ кв миэтэрэлээх олорор дьиэлэри тутарга туһалыаҕа.
Ону тэҥэ мунньахха хотугу улуустарга аһы-үөлү тиэйии уонна ититии сезонун хаамыытын туһунан өрөспүүбүлүкэ баһылыгар отчуоттаатылар. Анал болҕомто «Быһа линияҕа» уурулунна. Бүгүн олохтоохтортон ыйытыылары хомуйуу салҕанар.
Санатарбыт курдук, Айсен Николаевтыын «Быһа линия» балаҕан ыйын 27 күнүгэр олохтоох бириэмэнэн киэһэ 19:00 чаастан саҕаланыаҕа. Быһа эфир «НВК Саха», «Якутия 24», «Россия 24» ханаалларга, «Тэтим», «Радио России», «Виктория Саха», «СТВ-радио» араадьыйаларга уонна Айсен Николаев социальнай ситимнэригэр көстүөҕэ.
Ыйытыыларгытын @voprosGlaveYakutii_bot Telegram чат-ботка суруйан ыытыаххытын сөп эбэтэр колл-киин нүөмэригэр: 8 (4112) 506-006. Колл-киин үлэлиир бириэмэтэ: сарсыарда 9:00 чаастан киэһэ 18:00 чааска диэри.
Хаартыска: Саргын Скрябин / СИА
