Ил Дархан Айсен Николаев өрөспүүбүлүкэҕэ инвестиционнай климаты сайыннарыыга мунньах ыытта. Кини бэлиэтээбитинэн, 2023 сыл түмүгүнэн Саха сирэ инвестиция улаатыытыгар Россия уон бастыҥ регионун ахсааныгар киирбитэ уонна Уһук Илиҥҥэ иккис миэстэ буолбута.
«2023 сылга Саха сирин экономикатыгар 740 млрд солкуобай инвестиция быһыытынан көрүллүбүтэ, 2022 сыл көрдөрүүтүгэр тэҥнээтэххэ 4,4%-н үрдүк. Бу өрөспүүбүлүкэ муҥутуур көрдөрүүтэ буолар», – диэн Ил Дархан бэлиэтээтэ.
Төһө даҕаны муҥутуур көрдөрүү ситиһиллибитин да иһин инвестиционнай климаты сайыннарыы систиэмэтэ суох уонна былаас уорганнара биисинэс уопсастыбатын кытта сибээс мөлтөх Айсен Сергеевич бэлиэтээтэ.
«Инвестиционнай климакка анаан мунньахтар олох буолбаттар. Улахан, орто уонна дьоҕус урбааны кытары үлэ мөлтөхтүк ыытыллар. Сүрүн ыстаапка бырыһыана үрдээбитинэн урбаанньыттар туох да көмөнү ылбаккалар олус улахан бырыһыаннах кирэдьииттэри ылаллар», – диэн Айсен Николаев эттэ.
Ил Дархан толорор былаас уорганнарын таһынан олохтоох бэйэни салайыныы уорганнара үлэни тэтимирдэргэ ыйда, ол иһигэр Дьокуускай куорат эмиэ.
«Дьокуускай куорат дьаһалтатыгар урбаан тэриллиилэриттэн олус элбэх боппуруос киирэр. Киин куорат эппиэттээх салалтата биисинэһи кытары көрсүбэт буолбут. Сөптөөх үлэни ыытаргыт буоллар аҕыйах боппуруос киириэ эбит. Бу улуустарга эмиэ сыһыаннаах. Бу боппуруостарга болҕомтолоохтук сыһыаннаһаргыт ирдэнэр», – диэн Айсен Николаев бэлиэтээтэ.
Айсен Николаев өрөспүүбүлүкэ бырабыыталыстыбатын уонна муниципалитеттары биисинэһи кытары ситими олохтуурга, региоҥҥа инвестиционнай климаты тупсарарга ыҥырда.
