Саха сиригэр турбут ойуур баһаардарыттан 95%-на этиҥтэн сылтаан буолбут. Бу туһунан «Россия хаһыатыгар» Ил Дархан Айсен Николаев иһитиннэрдэ.
Ол курдук, Саха сирэ резко континентальнай климаттаах, олус итии, кураан сайыннаах. Бу кэмҥэ ойуур баһаардарыттан нэһилиэнньэлээх пууннар, экономика эбийиэктэрэ эмсэҕэлээбэттэрэ, баһаар уота киэҥ сиргэ күөдьүйбэтэ сүрүн сыал-сорук буолар.
«Биһиги икки ыйтан ордук кэмҥэ ардах түспэтэх оройуоннардаахпыт. Бүгүҥҥү күҥҥэ ойуур баһаардарыттан 95 %-на ардаҕа суох этиҥтэн үөскээтэ. Этиҥ этэр, ол эрээри турар куйаастан ардах сиргэ түспэт. Онтон чаҕылхан саайдаҕына кураанах сир субу умайан тахсар, баһаар үөскүүр. Өссө күүстээх тыалтан уот олус түргэнник тарҕанар», – диэн Айсен Николаев эттэ.
Билигин өрөспүүбүлүкэҕэ ойуур баһаарын умуруоруу үлэтигэр икки тыһ. кэриҥэ киһи кыттар уонна 200 ыарахан тиэхиньикэ үлэлиир. Күннэтэ уонча сөмөлүөт уонна бөртөлүөт баһаары утары охсуһар.
Ил Дархан бэлиэтииринэн, атырдьах ыйын 20 күнүттэн балаһыанньа быдан көнүөҕэ. 2021 сыллаахха турбут балаһыанньа Саха сиригэр быйыл үөскүө суохтаах. Ойуур баһаардара бырамыысалыннас суох сирдэригэр буола тураллар.
«Биһиги ойуурдарбыт олус киэҥ сиргэ сыталлар. Бэрэсидьиэн ойуур баһаардарын иэннэрин туруорбут көрдөрүүлэрин тутуһабыт. Ол эрээри бу сылга кыратык былааны куоһарарбыт буолуо. Ону кытта быйылгы сайын 2021 сыллааҕы көрдөрүүлэртэн хаалсыбат. Өйдүүрүм курдук, оччотооҕута аҕыс мөл. кэриҥэ га умайбыта. Оннооҕор биир сэлиэнньэ эмсэҕэлээбитэ, уонча дьиэ умайбыта», – диэн кини бэлиэтиир.
Хаартыска: «Россия хаһыата»
