Ил Дархан Айсен Николаев АЛРОСА генеральнай дириэктэрэ Павел Маринычевтыын көрүстэ. Өрөспүүбүлүкэ баһылыга Саха сиригэр хостоммут алмааска дойду бэрэсидьиэнэ Владимир Путин биллэрбит Россия норуоттарын сомоҕолоһууларын сылынан аат иҥэрэргэ этии киллэрдэ. Хампаанньа генеральнай дириэктэрэ бу көҕүлээһини өйөөтө.
Бу сыалларга анаан 2026 сыл кыһыныгар Айхальскай кэмбинээккэ хостоммут 106,47 карат ыйааһыннаах улахан алмааһы талбыттар. 23х20х22 миллиметр кээмэйдээх таас дойдуга биллэриллибит сыл бэлиэтэ буолуоҕа.
«Бу быһаарыныы дириҥ ис хоһоонноох. Саха сиригэр 135 норуот бэрэстэбиитэллэрэ эйэ дэмнээхтик олороллор, үлэлииллэр-хамсыыллар. Онон Саха сирин алмааһа дойдубут биир сүрүн сыаннаһын — Россия норуоттарын сомоҕолоһууларын — бэлиэтэ буолара сүрүн суолталаах», — диэн Айсен Николаев эттэ.
АЛРОСА генеральнай дириэктэрэ Павел Маринычев бэлиэтииринэн, хампаанньа үөрүүнэн өрөспүүбүлүкэ баһылыгын этиитин өйөөтө: «Айсен Сергеевич көҕүлээһинин уонна Норуоттар сомоҕолоһууларын сылын алмааска үйэтитэри үөрэ-көтө өйүүбүт. Норуоттар сомоҕолоһуулара уонна бэйэ-бэйэни өйөөһүн АЛРОСА ис култууратын тирэҕэ уонна биһиги сайдар күүспүт буолар».
Хампаанньа генеральнай дириэктэрэ тоһоҕолообутунан, бүгүҥҥү күҥҥэ АЛРОСА-ҕа 40 тахса норуот бэрэстэбиитэллэрэ үлэлиир-хамсыыр, онон сомоҕолоһуу, ытыктабыл өйдөбүллэрэ хампаанньа корпоративнай култууратын сүрүн тирэхтэрэ.
Көрсүһүү кэмигэр аан дойдутааҕы алмаас ырыынагын балаһыанньатын дьүүллэстилэр. Тас өттүттэн төһө да ыга баттыы сатааталлар, АЛРОСА аан дойдуга лиидэрдэр ортолоругар миэстэтин тутар уонна өрөспүүбүлүкэҕэ оҥорон таһаарар уонна социальнай суолталаах бырайыактары олоххо киллэрэрин салгыыр.
Хаартыска: sakha.gov.ru
