Саха сирин Ил Дархана Айсен Николаев «Здоровое общество – 2026» норуоттар икки ардыларынааҕы форум пленарнай мунньаҕар кытынна. Манна уопсастыбаннай доруобуйаны бөҕөргөтүүгэ норуоттар икки ардыларынааҕы уонна регионнааҕы бастыҥ уопуттары көрдүлэр.
Сессияны Россия доруобуйаҕа харыстабылын миниистирэ Михаил Мурашко салайан ыытта.
«Бүгүҥҥү күҥҥэ өрөспүүбүлүкэҕэ ыытар үлэбит көрдөрүүлээх буолан, Саха сиригэр киһи олоҕун уһуна дойду үрдүнэн орто көрдөрүүттэн үрдүк, оттон Уһук Илиҥҥэ – инники күөҥҥэ сылдьабыт. Бүтэһик сылларга доруобуйа харыстыбылын инфраструктуратын, маҥнайгы сүһүөҕүн, профилактикатын сайыннарыыга сөптөөх быһаарыныылары ылынаммыт үчүгэй көрдөрүүлэри ситистибит. Сессия кэмигэр медицинэҕэ тоҕоостоох уопуттарбыт туһунан сырдаттым. Ол иһигэр арыгыны бобуу миэрэлэрэ, «Мобильнай доктордар» бырайыак, оскуола медицинэтэ киирэллэр. Ити барыта биһиги биир кэлим систиэмэни олохтуурбутугар, медицина көмөтүн хас биирдии олохтоох туһанарыгар, дьон-сэргэ уһуннук олороллоругар төһүү буолар», – диэн Ил Дархан эттэ.
Россия доруобуйаҕа харыстабылын миниистирэ Михаил Мурашко Саха сирэ төһө даҕаны уустук суоллаах-иистээх, тыйыс усулуобуйалаах, ыарахан олохтоох-дьаһахтаах регион буолбутун иһин дойду үрдүнэн уопсастыбаннай доруобуйаҕа үрдүк көрдөрүүлэри ситиһэрин бэлиэтээтэ.
