Дьокуускай куорат Дууматын депутата Александр Ильин бэлиэтииринэн, «Дьокуускай куорат» куораттааҕы уокуругун баһылыгын талыы саҥа бэрээдэгэ муниципальнай уонна өрөспүүбүлүкэ былааһын икки ардыларыгар үлэни ордук ситимнээх оҥорорго көмөлөһүөҕэ. Бу туһунан Дьокуускай куорат Дууматын пресс-сулууспата иһитиннэрдэ.
Уларыйыылар федеральнай сокуонунан көрүллэллэр — 2025 сыл кулун тутар 20 күнүгэр ылыллыбыт № 33-ФЗ «Биир кэлим былаас систиэмэтигэр олохтоох бэйэни салайыныыны тэрийии уопсай бириинсиптэрин туһунан» Федеральнай сокуон 87 ыстатыйатын иккис чааһынан. Саҥа механизмынан, Дьокуускай куорат Дууматын депутаттара Ил Дархан киллэрбит хандьыдааттарын ортолоруттан Дьокуускай баһылыгын талаллар.
«Саҥа бэрээдэк уопсай түмүккэ үлэлиир биир хамаанданы тэрийэргэ кыах биэрэр. Үгүс регионнарга мээр быһаччы быыбардара куораттааҕы уонна регионнааҕы былаастар икки ардыларыгар бэлитиическэй утарыта турсууга тиэрдибиттэрэ, ол улахан суолталаах бырайыактары олоххо киллэриигэ уонна олохтоохтор кыһалҕаларын быһаарыыга охсубута. Бүгүҥҥү күҥҥэ былаас бары таһымнарын сөпкө үлэлэтии ураты дьоһун суолталаах», — диэн Александр Ильин бэлиэтээтэ.
Ону тэҥэ депутат саҥа механизм хандьыдааттар идэлэрин таһымнарыгар улахан болҕомтону уурарын ыйда.
«Бастатан туран, хандьыдааттар компетентностара, салайар уопуттара, быһаарыныы ылынар уонна чопчу түмүктэри ситиһэр кыахтара сыаналанар. Дьокуускайга өрөспүүбүлүкэ киин куоратын көдьүүстээхтик сайыннарар, киэҥ хабааннаах инфраструктура бырайыактарын олоххо киллэрэр кыахтаах күүстээх салайааччы уонна бөдөҥ хаһаайыстыбанньык наада», — диэн кини быһаарда.
Хаартыска: Дьокуускай куораттааҕы Дуума
