Аллараа Халыма улууһугар «Эһэлээх арыылар» бөлөх арыыларга айылҕа ураты харыстанар сирин тэрийии 20 саҥа үлэ миэстэтин хааччыйыаҕа. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.
«2020 сылга айылҕа ураты харыстанар сирин үлэһитин ахсаана 20 киһинэн бигэргэннэ. Билигин ирдэнэр анал тиэхиньикэни анааһын үлэтэ ыытыллар», – диэн этиллэр.
Саха сиригэр үрүҥ эһэлэр заповедниктарын тэрийии туһунан быһаарыы, дойду бэрэсидьиэнэ Владимир Путин этиитинэн олохтоммут «Экология» национальнай бырайыак чэрчитинэн 2020 сылга ылыллыбыта.
Национальнай паарка Халыма өрүс төрдүттэн хоту, Илиҥҥи Сибиирдээҕи муора бөлөх арыыларыгар баар буолуоҕа. Манна учуонайдар бэлиэтииллэринэн, сыллата 26-ҕа тиийэ үрүҥ эһэ оҕото төрүүрэ бэлиэтэнэр.
Бүгүҥҥү күҥҥэ бу бөлөх арыылар үрүҥ эһэлэр Саха сирин үрдүнэн арҕахтаан төрүүр биир саамай сүрүн сирдэринэн буолаллар.
