АЛРОСА үбүлээһининэн 10 саҥа уу таһар массыыналары Бүлүү бөлөх улуустарын аҕыс нэһилиэгэр тиксэрдилэр. Бу туһунан хампаанньа пресс-сулууспата иһитиннэрэр.
«ГАЗ» уонна «КАМАЗ» маркалаах уу таһар массыыналары Бүлүү уонна Ньурба куораттара, Кэнтик уонна Үөһээ Бүлүү сэлиэнньэлэрэ, ону тэҥэ Бүлүү улууһун Халбаакы нэһилиэгэ, Ньурба улууһун Октябрьскай нэһилиэгэ, Сунтаар улууһун Наахара уонна Илимниир нэһилиэктэрэ ыллылар.
«Саҥа автоцистерналар «2019-2024 сылларга Бүлүү бөлөх улуустарын уунан хааччыйыы систиэмэтин сайыннарыы» бырагыраама чэрчитинэн ылылыннылар. Үбүлээһин Үүнэр көлүөнэ тус сыаллаах пуонда нөҥүө АЛРОСА хампаанньа анаабыт үбүнэн ыытылынна», — диэн этиллэр.
«ГАЗ» массыына сыаната 2,78 мөлүйүөн солкуобай, «КАМАЗ» — 3,9 мөлүйүөн солкуобай. Массыыналар уопсай суумалара 33,42 мөлүйүөн солкуобайга тэҥнэһэр.
«Бырагыраама үлэтин салҕыыр. 2024 сылга диэри өссө алта массыына кэлэрэ былааннанар», — диэн АЛРОСА хампаанньа судаарыстыбаннай былаас тэрилтэлэрин кытары үлэлиир салаатын салайааччыта Ладимир Аргунов кэпсээтэ.
Массыыналары Магадантан уонна Вологдаттан аҕаллылар диэн бэлиэтэнэр.
«Саҥа тиэхиньикэ кэлиитэ иһэр ууну хааччыйыы боппуруоһун быһаарыа. Бу биһиэхэ улахан үөрүүлээх түбэлтэ. Ыраастаммыт ууну тиэрдиигэ үлэбитин чэпчэтиэ. Инники чааһынай тэрилтэлэр ууну таһар эбит буоллахтарына, билигин бэйэбит анал тиэхиньикэлэннибит», — диэн Кэнтик нэһилиэгин баһылыга Валерий Николаев эттэ.
Уу таһар массыыналар хотугу сир усулуобуйатыгар үлэлииргэ ананан оҥоһуллубуттар, собуоттан мэктиэлээхтэр. Цистерналарын киэлитэ 4200 уонна 4800 лиитэрэҕэ тэҥнэһэр. Ис өттө дьэбинирбэт ыстаалтан оҥоһуллубут.
Массыыналар анал суолга куттал суох буолуутун хааччыйар курдаахтар, суһал көмө ыҥырар кнопканан уонна ГЛОНАСС систиэмэ хааччыллыбыттар. Маҥнайгы сырыыларын Бүлүү бөлөх улуустарыгар бу күннэргэ номнуо оҥоруохтара.
