АЛРОСА хампаанньа коронавируһу утары үлэҕэ ороскуота 900 мөлүйүөн солкуобайтан тахсыбыт. Бу харчыттан 95%-на Саха сирин үрдүнэн эпидемияны утары үлэҕэ туһанарыгар көрүллүбүт. Итиэннэ Мирнэй оройуонун медицинскэй тэрилтэлэригэр барбыт.
Хампаанньа генеральнай дириэктэрэ Сергей Иванов быйыл пандемияттан сылтаан алмаас атыыта түспүтүн бэлиэтиир. Ол даҕаны үрдүнэн хампаанньа социальнай эбээһинэстэрин толорор. Билигин атыыга араас ньыманы туһаналлар. 2020 сыл балаҕан ыйыттан атыы аргыый үрдээбит. Сэтинньи ый устата 370 мөлүйүөн долларга атыылаабыт.
«Бу сыл устата биллэн турар, урукку сылларга тэҥнээтэххэ, алмаас атыыта кыра буолар. Салгыы ырыынак чөлүгэр түстэҕин аайы, үрдүө дии саныыбыт», — диир Сергей Иванов.
Урукку кириисис кэмигэр хампаанньа судаарыстыбаннай өйөбүлүнэн туһамматаҕа. Быйыл Саха сирин салалтата быйыл Гохраҥҥа алмаас атыылаһалларыгар көрдөстө. «Бу өйөбүлүнэн эһиил балаһыанньа мөлтөөтөҕүнэ, туһанар былааннаахпыт», — диэбит генеральнай дириэктэр.
Ил Дархан Айсен Николаев пандемия буолбутун да үрдүнэн, хампаанньа сөптөөх дьаһаллары ылынан, ыарахаттары этэҥҥэ туораата диэн бэлиэтиир.
