Бүгүн «Хозактив-2025» форумҥа АЛРОСА генеральнай дириэктэрэ Павел Маринычев уонна Инновациялар сайдыыларын пуондатын дириэктэрэ Вера Птицына Саха сирин эдэр технологическай хампаанньаларыгар саҥа аартыктары арыйар бииргэ үлэлэһии сөбүлэҥэр илии баттаатылар.
100 мөлүйүөн солкуобай — бу аҥардас бырайыактарга эрэ буолбакка дьон баҕа санаатын, идиэйэтин олоххо киллэрэргэ көрүллэр инвестиция. Аныгы сайдыылаах кэмҥэ эдэр хамаандалар бэйэлэрин көрдөрөллөрүгэр, ырыынакка ирдэбиллээх бородууктаны оҥорон таһааралларыгар төһүү күүс буолар.
«Биһиги билигин бэйэбит технологиябыт суверенитет боппуруоһа буолар кэмигэр олоробут. Саха сиригэр күүстээх ИТ-кластер оҥоһуллара – систиэмэлээх үлэ түмүгэ. Бүгүҥҥү күҥҥэ биһиги хампаанньаларбыт оҥорон таһаарбыт бородуукталлара медицина, үөрэх уонна авиация курдук эйгэлэргэ туһаныллар. АЛРОСА хампаанньаҕа стратегическай толкуйдааҕын уонна саха исписэлиистэригэр эрэллээҕин иһин махтанабын. ИТ-хайысханы өйөөһүн — сарсыҥҥа күҥҥэ эрэллээх буолуу», – диэн Саха сирин Ил Дархана Айсен Николаев эттэ.
